Acts 19

Paulo Mulai ne Epeso

1 ^aIoxe no mine Apolosi muxolu ne Kolinito, la Paulo mumuamua'i mupolo no nano no laxatetelo no xalee lia tila ne. La mulai muxali ne Epeso. Muxali lai ne la muxalisi'a ta molomolo noxou Iesu mose'i. 2 ^bLa anu mutali'isi'a aloxo 'o, “Loxovaa 'o, no mine ngingi ngemuxaxu tangengi, la Uleenu Tavuna muxolu noxinge?” La ane'i mikolinu tali'i noxou aloxo 'o, “Nexi talomusou Uleenu Tavuna sevile uasi.” 3La anu mutali'i la aloxo 'o, “Ia loxovaa, 'ulo'ulo iou anevaa ane ngingi nge'ulo no anu?” La ane'i mikolinu lexe, “'Ulo'ulo noxou Ioanesi.”

4 ^cXe Paulo muavuti la muvikalane'i lexe, “'Ulo'ulo noxou Ioanesi ne anu 'ulo'ulo sou taxiu oponenge. Anu muvikalane'i ta mitema sou imuxaxu tane'i noxou Anu ane une'e ili'i noxou. Ane une'e ili'i ne, Anu ane Iesu.” 5Ane'i milomusou vaikala ane ne, la ane'i mi'ulo no anu ualasou Tila Iesu. 6 ^dIoxe no mine Paulo mumulaxu avolu teitexi noxi'a xe Uleenu Tavuna mune'e muxolu noxi'a, la ane'i mivikala no anu vaikala iouiou mo mia'aloxu palomatana noxou Lataua. 7Ane'i mukalusi ne itiitisi'a loxo mavulovexa vile mo mulu'e no lia tamei.

8Xe Paulo mu'una no anu taasou lalotu noxi'a ta Iutaia ne la muvikala pekia'u ia u'ume uasi mumomomo loxo so'io tatalu. Anu ilo'a mivikala sou lexe ulapunu xavutalai'a no anu saxisaxila'u noxou Lataua. 9Ia mose'i noxi'a ne opone'i pekia'u mo imuxaxu tane'i uasi. La ane'i mivikala masumasua sou vote'i noxou Tila ane ne no ie'i ta mitema ta piena. La sou Paulo ilo'a ta mitema ane'i ane mimuxaxu tane'i noxou Iesu mi'umesi'a milai va'axu. Ane'i mipita sou mivikala no voxovoxo utotomu no anu taasou lavulavu noxou Tilanosi. 10Ane'i mixaxai aloxo ne si mumomo mo tauu ie tamei. Aloxo ne la sou ta Iutaia ilo'a ta Xiliki mukalusi ane'i mixolu no anu xalee lia tila ne Asia ne milomusou vaikala noxou Tila.

11 ^eLataua mulosou Paulo xavi iouvilemo sou mu'oxonu sosovo iouiou aloxo 'o. 12 ^fTa mitema mino'u lavalava xasixu la mine'e mimuxaxu vaxa noxou Paulo vasimolu xe mukalu la mino'u mulai sou mimulaxu muvaxa noxi'a ta mitema e mipipiena no vasime'a la ane'i laixene'i. Mo ta uleenu ta masumasua mixexesi'a kalumo.

13Ia ta Iutaia mose'i ane'i mixixaoxao sou mixexene'i ta uleenu masumasua ne mitovonu sou lexe ikusai'a ta uleenu ta masumasua no anu Ualasou Tila Iesu, la ane'i mivikala aloxo 'o, “Nexi takusainge no nano no anu Ualasou Iesu e Paulo mua'aloxu, la sou nexi tavikalangengi pekia'u lexe ngalaa mo ngaxexee.” 14Sukeva e tilasi'a ta aili'i noxi'a ta Iutaia ta 'olu muxatele tamei ane'i ilavusou i'oxo'oxonu aloxo ne. 15Ia alaxu vile la uleenu masua vile ne muavuti la mukoline'i aloxo 'o, “Iesu ne eni elavusou mo Paulo ne eni elavusou, ia ngingi ngata'ei 'o?” 16La sou itema ane uleenu masua muxolu noxou ne xaviinu mu'oki. Anu muili'e la mupeilauline'i xe muve'ave'a masua mole misomisou vasime'a ne mukakaka mo vasime'a ne siasialuxu la mi'ume milai no ale ne pangapanga'asi. 17 ^gXe no mine ta Iutaia 'ilo'a ta Xiliki mukalusi ane'i mixolu lai ne Epeso ne milavusou mii ane muxali ne, la ane'i mimama'u la miitiitinu ualasou Tila Iesu. 18Ta piena noxi'a ane mimuxaxu tane'i mukalu mine'e mitulu no ie'i ta mitema latala ne io mivikala lamana no anu 'ilixo masumasua ane ane'i mi'oxonu. 19Mo ta piena noxi'a ane'i ane milavusou mi'oxonu kasila ilou saa mo aalu iouiou ne miitaxusou lavukui'a e mikaukavu mimii ne no anu, ka mine'e mipita sou mielaxu no ie'i ta mitema tavu'alo. Xe miitisou lamolisou lavuku e mi'elaxu ne mipita la itiitisou muxali loxo itemaxu mavulovexa ta'uve alaxu mavulovexa ta'uve (50,000). 20Aloxo ne la sou vaikala noxou Tila muxali pekia'u mo mulutu mulai no tuatuala mukalusi.

21 ^hNo mine mimii ane 'o muxali mukalu, la Paulo mumuxau xavutala sou lexe ulai ne Ielusalemu la upolo ulai ne Makedonia xe ne Akaia. Anu muvikala lexe, “Ili'i no mine eni apolo alai ne ukalu, la eni alai amaisi'a ne Romu kalumo.” 22Anu mupalusi'a ta mitema sou su'uli tamei noxou e Timoti ilou Elasito sou milai ne Makedonia. Ia anu muxolu sevile lai no xalee lia tila ne Asia.

'Oto'oto Lai ne Epeso

23 ⁱNo voxo ngiiou ane ne, la ta mitema mi'ava'ava mo lai'axa'a muxali ne Epeso ne xo no anu vote'i noxou Tila. 24Xo itema vile ualasou lexe Demeteliusi e itema sou u'oxonu mimii no anu siliva muxaxai sou mu'oxonu taasou lalotu tovolai sou kitukitu'a noxie lataua kalavoi Alutemisi. Anu mu'oxo aloxo ne, la ta mitema sou xaixai mino'u lamoli kitu'a uasi. 25Anu mu'avali'a ta mitema sou xaixai ilo'a ta menexi'a se'i e ixaxai ilo'a la mine'e mipita io anu muvikala aloxo 'o, “Ta menexixe ngingi ngelavu lexe nenge teno'u lamoli laixe no anu xaixai ane 'o. 26Ia ngingi ngamaisou mo ngalomusou itema ane Paulo anu mulapune'i mo muxovulaune'i ta mitema ta piena lai ne Epeso mo no anu xalee lia tila ne Asia mukalusi. Anu muvikala lexe lataua ane ta mitema i'oxonu no avo'a ne anu lataua maninasou uasi. 27Vaikala ane 'o ne u'oxonu masuanu xaixai noxinge la xaixai noxinge uxali mii vitanisi, la taasou lalotu noxi'a lataua tatila Alutemisi kalumo ne uxali mii vitanisi kalumo. Mo ta mitema mukalusi no xalee lia tila ne Asia mo xalexalee lialia ukalusi ne ilotu noxie la uasi, xo uala tatila noxie ne mumasua mo ukalu vitanisi.”

28No mine ane'i milomusou aloxo ne, la ane'i la'iaxa'a masua mo miavuti sou mi'ava lexe, “Alutemisi noxi'a ta Epeso ne ane tatila manina.” 29 ^jAlaxu vilesisi la tuala tatila ne 'ava toxoxu muxali no anu mukalusi. Xe ta mitema miavuti la mitetelisi'a Xaiusu ilou Alisitaluko e tavaitamiou Paulo sou ilo'a mimuamua'i. Ane'i ilou ne sie Makedonia. Xe ta mitema mixasilisou milapune'i ilou la ilo'a mi'una no tani tilasou pitapita ne. 30Ia Paulo ne mumasaxa sou upala'a noxi'a ta mitema latala ne, ia ta molomolo noxou ne miapixu la ulai uasi. 31Mo ta menexu mose'i kalumo e ane'i ta tatila no xalee lia tila ne Asia misovanu vaikala mune'e noxou milingau pekia'u lexe ulai no nano no tani tila sou pitapita ne mamu.

32La sou ta mitema ta piena ane'i mipita ne mixovulaulausi. Mose'i mi'ava sou milemolu mivile xe mose'i ne mi'ava sou milemolu mii vilemo. La ta piena noxi'a ne ilavu lexe tava'u loxovaa la sou mine'e mipita ne uasi. 33La ta Iutaia misounu Alekisanda mulai mu'uli no talaxa'a. Io ta mitema mose'i mi'ava'ava sou mipela'u. La anu mukamiie'i no avolu sou lexe anu uvikala lamana noxi'a. 34Ia no mine ane'i milavusou lexe anu itema Iutaia vile, la ane'i mukalusi ne mi'ava mukei umomomo loxo aso iou tamei aloxo 'o, “Alutemisi noxi'a ta Epeso ne ane tatila manina.”

35La itema sou kaukavu no anu tuala tila ne mutulu la mutolosou avolu sou ta mitema ixolu tasiau la muvikala lexe, “Ta mitema sie Epeso, ta mitema mukalusi no lialia 'o, milavusou lexe tuala tila ne Epeso ne anu usaxila'u taasou lalotu noxie tila Alutemisi ilou lavo'o tavuna noxie ane mulapau molu no loxotolo mulu'e. 36La sou loxo mimii ano 'o ne anu itema vile umomomo sou usingisou uasi, mo ngingi ne ngaxoo tani ukisi io nga'oxonu anangenge vitanisi mamu. 37Ngingi ngene'e ne'i ta mitema ano 'o lai 'o, ia ane'i ipulumasou ino'u mii vile no 'a taasou lalotu mo ivikala ipupuiou lataua mengi uasi. 38Lexe aloxo ne la Demeteliusi ilo'a ta menexu ta mitema sou xaixai ne lexe itelonu vaikala noxou evile. La voxo sou vaivaikala mo itema sou ulomusou vaikala anu a uxolu. La sou ilo'a imomomo sou vaikala sou. 39Xe lexe mii ma'ia la ane ngingi ngamasaxa lexe ngaxalixu la sou ngingi ngamomosou no anu voxo sou pitapita. 40Ia ano 'o ne laixe uasi lexe nenge tano'u masua sou tatulu no 'a vaikala sou 'oto'oto no anu mimii ane muxali vaimomo 'o. Lexe aloxo ne la nenge tamomomo sou takoli vaikala uasi xo mii ane ne tava'u uasi.” 41Ili'i no mine anu muvikala aloxo ne mukalu, la anu mupalusi'a ta mitema milailai.